مجلة جمهورية مصر العربية الاسبوعيه رئيس التحرير جعفر الخابوري

نور الشريف .. الحب كله

في شيء في نور الشريف يخليك تحبه كممثل .. انه بيجيب الشخصيات دي من الشارع .. اه فيه ورق .. لكن هو بينزل الشارع يلقط الشخصيات دي .. يعني هديك مثالين كاشفين .. في فيلم العار .. كان كمال بيعمل حركة كدا انه يمد دماغه لقدام كدا .. فدي مش مكتوبة في السيناريو .. نور الشريف جابها منين .. شافها في كازينو .. فساله الراجل دا بيعمل كدا ليه .. فقالوله اصل طول عمره لابس جلابية ولسه لابس البدلة جديد .. فبيعمل الحركة دي اراديا .. فاستخدمها مع كمال العطار اللي شغال من وهو صبي مع ابوه ولبس البدلة على كبر..

حاجة تانية .. فيه قصة اسمها لن اعيش في جلباب ابي .. عملها فريد شوقي في الراديو .. ومصطفى محرم عملها معالجة .. لكن نور الشريف راح قعد مع تاجر خردة اسمه الحاج نادي .. وهنا بتحصل اللخبطة... والناس مفكرة ان نادي هو دا صاحب القصة الحقيقية ودا مش صحيح خالص .. هو قعد معاه علشان يلقط منه ازاي المعلم بيقعد وياكل ويشرب.. لكن نادي مالوش اي علاقة بعبد الغفور البرعي.

دي الحاجات اللي بتخلي نور الشريف صادق قوي في كل اللي بيعمله.. لكن انا هتكلم عن نور الشريف الانسان بعيدا عن نور الشريف الممثل اللي الحقيقة يستحق كتاب كامل .. بس ربنا يدينا الوقت والصحة..

نور الشريف اصلا اسمه محمد جابر محمد عبد الله... جابر محمد عبد الله والده اتجوز امه وخلف محمد وعواطف.. ومات وهو 26 سنة .. ونور مشافهوش اصلا.. وكل اللي بيربطه بيه كان صورة متعلقة في الحيطة .. ونور بسبب الموضوع دا حصله عقدة من الحياة وكان فاكر انه هيموت صغير زي ابوه ورافض يتجوز علشان ميجيبش عيال يحسوا باليتم زيه.

لما مات والد نور الشريف .. كانت امه بنت صغيرة عندها 22 سنة بس.. طبعا بنت صغيرة .. واهلها قالولها لازم تتجوزي .. لذلك نور الشريف مشافش ابوه واتحرم من امه ..

واللي رباه عمه اسماعيل وكانو بيدلعوه يقولوه يا نور .. فبقى مفكر ان اسمه نور اسماعيل .. لحد ما في يوم في المدرسة. نادوا على اسمه .. فين الولد محمد جابر .. وكان نور الشريف متقمص شخصية اسماعيل ياسين ويقولهم يا جماعة اللي اسمه محمد جابر يرد .. لحد ما قالوله يا بني انت محمد جابر .. فاكتشف انه مش نور اسماعيل زي ما هو فاكر .. لا هو محمد جابر ..

ولما امه جات تاخده علشان يعيش معاها فضل يصرخ في وشها .. وهرب يستخبي في حضن عمته .. وفضل الحال على كدا .. لحد ما امه قررت خطفه بالاتفاق مع جوزها علشان يعيش معاها.. وكان نور طالع من المدرسة .. ولقى ناس عايزين يخطفوه .. فطلع صرخة لمت الشارع .. وفشلت المهمة..

لكن فضل نور الشريف كاره لامه ومش طايقها ومش ناسيها ليها.. لحد ما درس علم نفس .. ولقى ان جوازها حق ليها خصوصا انها كانت لسه صغيرة .. ومشافتش الحياة ولا لحقت تشوفها مع ابوه .. وصالحها وندم على معاملته الوحشة ليها.

نور الشريف كان طفل ذكي جدا .. يعني كان لاعب كورة هايل وانضم لمدرسة اشبال الزمالك.. وكان بيلعب في فريق حسن شحاتة .. وكمان كان طالب شاطر وحصل على دبلوم المعهد العالي للفنون المسرحية بتقدير “امتياز” ... وكان الأول على دفعته عام 1967م.... واشتغل في التدريس في المعهد وكان من الناس اللي درسلها أحمد زكي.

طيب هنمثل .. هيبقى محمد جابر ولا نور جابر .. ولا ايه بالظبط .. اخته عواطف قالتله والنبي تخليه نور الشريف علشان انا بحب عمر الشريف .. وقد كان نور الشريف اللي هو اصلا محمد جابر..

سنة 1966 قدم نور الشريف اول دور سينمائي ليه في فيلم قصر الشوق ودور كمال عبد الجواد .. اللي رشح نور الشريف للدور دا .. كان عادل إمام .. وكان ليه ظهور قبل كدا سنة 1964 في مسلسل الاشياء النفيسة.. وسنة 1965 في مسلسل لا تطفئ الشمس...

لكن فضل نور الشريف يسمي كتير من ابطال افلامه جابر على اسم ابوه .. يعني على سبيل المثال لا الحصر .. دور جابر عميش في دم الغزال .. او دور جابر الونش في فيلم الظالم والمظلوم.. او دور جابر عبدالغفار في فيلم بئر الخي*انة .. او جابر متولى إسماعيل في أجراس الخطر.. او او او ..

في سنة 1984، اتعرض فيلم اخر الرجال المحترمين واللي بيحكي عن مدرس بيطلع رحلة مع المدرسة فبتتخطف منه طفلة اللي هي يا نسمة ... يا نيسمة، وبيحاول يدور على البنت فيكتشف من خلال رحلة البحث عن البنت سلبيات المجتمع المصري.. وصعوبات الحياة في القاهرة .. الفيلم انتاج نور الشريف نفسه، بس هو هيعمل الشخصية دي باي مرجعية.. استعان بشخصية جابر ابوه .. قال نور الشريف قبل كدا في حوار انه كان بيقلد شخصية ابوه اللي انطبعت في ذهنه من حكاوي الناس عنه.

الفيلم منجحش خالص رغم انه خد جايزة افضل فيلم .. وقال ان دا الفيلم الوحيد اللي حققلي خساير كتير في تجربتي الانتاجية.. لكن هيفضل واحد من افضل افلام نور الشريف ..

مساعد نور الشريف كان اسمه نور .. بيحكي في حوار لمصراوي مع الزميلة منى الموجي، ان اخر كلمة قالهاله: "يا نور أنا تعبت من التعب".

والسيرة أطول من العمر يا محمد يا جابر..

#بهاء_حجازي