البحرين... حُور العِين

البحرين... حُور العِين

إلى البحرين وَدِّيْني يا مايِهْ

لِحُوْرْ اِلعِيْنْ هُمْ غايَةْ مُنايِهْ

أَنا شافِقْ عَلَى شُوْفَةْ بِلادِي

تَرِّسْ يا شِراعْ عَلِّى بي يامايِهْ

***

إِذا سافَرْتْ وُرِحْتْ إِبْعِيْدْ عَنْهِهْ

يِحِنْ قَلْبِي وُتَوْنِي ياي مِنْهِـهْ

وِاذا طالْ اِلْسَفَرْ زادْ إِشْتِياقِي

تِمَنِيْتْ اِلْعُمُرْ آقْضِيْهْ يَمْهِـهْ

***

بِلادِي عِزْوِتِي وَاْحْبابِي فِيْهِهْ

حَياتِي وُدِنْيِتِي عُمْرِي عَلِيْهِهْ

آفَضُّلْهَهْ عَلَى كِلْ اِلْبَلادِيْــنْ

إِهِي أَرْضِي إِهِي دارِي وَابِيْهِهْ

***

بِلادْ اِلخِيْرْ وِالْحُبْ وِالمُـوَدِّهْ

جَزِيْـرَهْ فَضْلَهَهْ ما أقْدَرْ آعِدِّهْ

هِيَ البَحرِيْنْ تَعْجِبْ كِلْ زايِــرْ

وُهِي نَسْمَةْ عِطِرْ مِنْ كِلْ وَرْدِهْ

***

بـلادي أفدي اترابك بروحي

وارواح الشعب ماني بروحي

ونرفع رايتك حــره وأبيه

إلى أمـن وسلام الله روحي

***

بِلادِي ما جِفَتْ مَـرَّهْ عَلِيْنِهْ

وَلا شِفْنِهْ قَهَـرْ مِنْهَا وُمَهِيْنِهْ

إِذا الأعْداءْ بِتْشَوِّهْ بِــلادِي

أَبِيْعْ اِلرُوْحْ وَأهْدِيْهَا اِلسَكِيْنِهْ

***

تِرابْ بْلادِي في الغُرْبَهْ هَدِيِّـهْ

آشِـمْ فـي لَثْمِتِـهْ لِمْحَرِّقِيِّـهْ

مِنْ الاحْبابْ فاحَتْ مِسْكْ وُعَنْبَرْ

وُمِنْ اِلخِلانْ وَرْدِهْ مْحَمِّدِيِّــهْ

***

تِـرابْ اِلـدارْ لِلأحْرارْ جَنِّـهْ

أَمانِـهْ نَحْفُظَهْ وُنْــذُوْدْ عَنِّهْ

تِهُوْنْ اِلرُوْحْ بَسْ اِلارضْ تِبْكَهْ

وُصُوتْ اِلحَقْ يِعْلَى في وَطَنِّهْ

***

تِرابْ اِلأرْضْ في دَمِّي وَآحِسْ بِهْ

في تَكْوِيْنِي صُبَحْ نِسْبِهْ بِنِسْبِــهْ

أُهُوْ الوِجْدانْ وِالاحْساسْ فِيْنِــي

وَانا مِنِّـهْ وُهُوْ مِنِّــي آحَسْبِـهْ

***

تنسنس يا هـوا شعـري غناوي

وسمعنـي وسمـع كــل غاوي

على ديـرة هلـي أرقص وأغني

غناوي الشوق من يوف الهواوي

***

جَوْاهِرْ فِي البَحَرْ يا حالَةْ إِنْعِيْمْ

وُحالَـة لِسْلِطَهْ كَمْرَهْ بَلا غِيْمْ

مَحامِلْ لسِّـفُرْ وُالْغُوْصْ فِيْهُمْ

وُطَبْعْ أَيْـوادْ عاداتْ وُمَراسِيْمْ

***

جَزيرَه وِالسِمهْ والأرض والماي

أَنا غَواصْ وُهي شْراعي وُبلْماي

أَبارِيْهُمْ عَـنْ هْبُوْبْ اِلعَواصِـفْ

وُخاطِفْ شُرْعُهُمْ وِالرِيْحْ وَلْماي

خليفة العيسى