صحيفة جعفر الخابوري الاسبوعيه رئيس التحرير جعفر الخابوري

منطق وهبي السوالمي

أنا عمري ما كرهت شخصية وهبي السوالمي في مسلسل الضوء الشارد .. بل ومع اعترافي باجرامه ... أنا كنت متعاطف معاه .. متعاطف معاه لاني شايف موقفه رد فعل مش فعل... وخليني اقولك اللي حصل..

وهبي وأبوه وأخوه وصفي كانوا شغالين عند سلطان بيه العزايزي ... اللي هو أبو رفيع وجوز الحاجة ونيسة الشهيرة بجملة "رفيع بيه يا ولدي".. مرات وهبي اللي هي ام نفيسه تعبت .. وكان علاجها كله خمسين قرش ... خاف ابو وهبي يطلبها من سلطان بيه باعتبار انه شغال عنده ... لانه توقع إن سلطان بيه هيضربهم لو طلبوا مبلغ زي دا ... فماتت الست وهي بتولد نفيسة

(خد بالك هنا سلطان بيه بيمثل الجانب الخير عند الناس، وكل شوية الحاجة ونيسة تقولك وصية سلطان بيه الله يرحمه، ما يولع سلطان بيه ووصيته عادي، ما هي مش وصية سيدنا يوسف).

اسرة وهبي طبعا مهزقين ... لأنهم المفروض يسيبوا الشغل .. لكن لا هما كملوا .. ومع إنه شغل حقير مش موظفين اتش ار هما ... هما كانوا رباعين .. والرباع دا اللي بينضف تحت البهايم ... وكان مرزوق ابو وهبي عظيم في الشغلانة دي بشهادة النايب ابو القاسم وتابعه وجوز بته صبري.

المهم .. وصفي حب نجاة بنت اخو سلطان بيه .. وقرر إنه يطلب إيدها .. طبعا بغض النظر عن سذاجة الفكرة وإنه هيرفض يديك نص جنيه ينقذ مرات اخوك بيها من الموت .. هيديك بنت اخوه تتجوزها.. دا انت اطيب من الاستاذ بهاء سلطان يا وصفي.

هو طبعا من حقه يرفض .. وبين الشاري والبايع حرف الواو... فهنا سلطان بيه مش بس رفض .. ابسلوتلي .. لا دا مارس هوايته المفضلة في تعذ*يب مرزوق وابنه وصفي .. لحد ما وصفي قرر يبقى ارها**بي ومرزوق قرر يطلع معاش من التعذيب.

طبيعي راجل مراته ماتت عشان نص جنيه.. إنه يقرر يبقى غني .. حتى لو بطرق غير مشروعة .. سلاح مخد** رات يشتغل في الانتخابات .. اي مصلحة .. المهم هو بقى غني وقرر فتح صفحة جديدة .. وراح يعمل الواجب ويبارك للناس اللي لسوعوا اهله 15 مرة .. مع إن فارس دا اتخرج من معهد كمبيوتر في شرم الشيخ بمجموع 12٪ .. يعني مكانش دكتور نسا وتوليد.. بل كان طول المسلسل لابس شورت ولما لبس بنطلون مات.

طيب لما راح يبارك ... كانت النتيجة إيه؟

كانت النتيجة إنه اتهان من أبو القاسم وتابعه صبري في مشهد لو اتعمل فيك هتقرر تنتقم برضه.

في الحلقة الأخيرة من المسلسل بيحصل حوار كاشف بين نفيسة ووهبي، فيه فلسفة المسلسل، اللي الناس مفهمتهاش،

(إنتي أمك ماتت وانتي عيلة علشان مكانش معانا 50 قرش ندوها للدكتور اللي يداويها.. وجدك من الخوف مقدرش يقول لسلطان بيه يدهاله، يمكن لو كان قاله كان جلده.. زي ما عملها بعد كدا وضيع كرامته وضيع معاها عمك وصفي، دا تاريخ أسود يا بتي، محدش قدر يخرج من دايرته غيري، وزدلوقتي جه وقت الحساب، اللي بيقول ان الحق والعدل ان مال سلطان بيه يبقى لينا كلنا..

فنفيسة بتقوله : "لما هو سلطان بيه اللي عمل فيكم إكده.. ذنب ولاده ايه؟
فرد عليها، وقالها: "ومحدش سأل سلطان بيه وقتها أنا ذنبي ايه... فنبقو كلنا مجرمين وكلنا اتجني علينا، واللي يغلب بقى".

#بهاء_حجازي